Pahayag ng IFJ, isang kasinungalingan!!

Isang malaking kasinungalingan ayon sa grupong I-WATCH, isang anti-crime NGO, ang pahayag ng International Federation of Journalists(IFJ) kamakailan, na mapanganib na lugar ang PILIPINAS para sa mga mamamahayag. Ayon kay GASPAR SAN DIEGO, pangulo ng I-WATCH at isa ring Broadcast Journalist, " isang iresponsable at malaking kabulaanan ang pahayag ng IFJ, walang malinaw na batayan ito at sumisira sa imahen ng ating bansa." Sa statement ng IFJ noong nakaraang buwan ng Disyembre 2006, pumapangalawa ang Pilipinas sa IRAQ na delikado umanong lugar para sa mga journalists, 13 kasapi ng media ang napatay diumano.

"Bagaman at may mga insidente ng pamamaslang, mayorya sa mga ito ay hindi work-related na gaya ng ipinangangalandakan ng IFJ. Maagap din at masigasig ang PNP upang bigyan nang kalutasan ang mga kaso. Tumatagal lamang ang pagresolba kapag ayaw makipagtulungan ng mga kaanak ng napaslang. Ang mga data naman ay minamanipula upang gamitin na propaganda ng mga militante laban sa gobyerno." pagbibigay diin ni San Diego.

Sa opisyal na record ng PNP, 2 lamang sa 10 kaso nang pagpatay sa taong 2006 ang work related. Ito ay ang kaso ng pamamaslang kay Rolly Canete ng DXPR at Fernando Batul ng DYPR. Sa kaso ni Canete, kinasuhan na ng murder ang isang Herbert Liguan at isang John Doe sa ilalim ng IS# 06-01-067. Nasa RTC Branch 18 na ng 9th judicial region sa ilalim ng Criminal Case # 8167-2006 ang nabanggit na kaso. Noong August 18, 2006, nadakip ang prime suspect na si Herbert Rosaldez Liguan.

Samantala, nadakip agad ng PNP si PO1 Aaron Galifardo, ang pangunahing salarin sa pagpatay kay Fernando Batul, halos dalawang araw matapos ang pamamaslang sa biktima. Agad na sinampahan ng kaso ang dating pulis na tinanggal sa serbisyo alinsunod sa RPHRDD # 120 dated 26 May 2006.

Ang walong iba pang kaso ay hindi work-related na gaya ng inilutang ng IFJ. Kabilang sa mga ito ay ang pagpatay kina: Orlando Mendoza, Nicholas Cervantes, Alberto Orsolino, Maricel Alave-Vigo, Jorge Fellones Vigo, Armando "RACMAN" Pace, Prudencio Orsolino Melendrez at Ralph Revita Runez.

Kabilang sa mga naging motibo sa pagpatay sa walo ay ang land dispute, double cross sa reward money, personal vendetta at robbery holdup. Ang mag-asawang Jorge at Maricel Vigo ay naging biktima naman ng paghihiganti ng CPP-NPA. Si Dionisio Madanguit ng CPP-NPA, Gureilla Front-51 ang utak sa pagpaslang sa mag-asawa. Si Jorge ay dating kasapi ng ANAKPAWIS at pinaghinalaang nagkanulo sa isang Kumander Benjie na napatay sa enkuwentro ng Phil. Army noong November 2004. Si Maricel ay isang dating kasapi naman ng Kilusang Magbubukid ng Pilipinas (KMP).

"Sa mga kaso nang pagpatay, malinaw ang orkestrado, sistematiko at malawakang kampanyang pampropaganda ng mga militanteng grupo na wasakin ang imahen ng ating gobyerno. Itinutuon lagi sa pamahalaan ang sisi at sa mga institusyong kagaya ng PNP at AFP upang manghina at manlupaypay ang mga ito at nang madali nilang maibagsak ang demokratikong institusyon." paglilinaw pa ng pangulo ng I-WATCH.

"Sa kabila ng mga diumano'y panunupil sa hanay ng mga journalists, dito sa ating bansa ay nagagawa nilang pulaan, pagsalitaan ng masama, murahin, paglaruan at gawing katawa-tawa ang mga personaheng kanilang binabatikos. Nagagawa nilang wasakin ang dignidad at pagkatao ng isang tao, gawing itim ang kulay puti at gawing puti ang kulay itim. Ito ba ang uri nang pantay at patas na pamamahayag?" pagtatapos na pahayag ni Gaspar San Diego.

Sa Pilipinas, ang mga negatibong inpormasyon ay isinusubo ng National Union of Journalists of the Philippines (NUJP) sa mga International Media Organizations. Batay sa isang statement ng NUJP sa kanilang web site: "In cases where it is not clear whwther the death was work related or when the authorities could not ascertain the motives behind the killing; NUJP shall assume that the killing was work related..."

23 January '07

10:10 AM

QC, Philippines

2 NPA, napatay sa labanan!

Dalawang kasapi ng NPA ang napatay matapos makasagupa ng tropa ng pamahalaan sa mabundok na bahagi ng Sitio Langawel, Barangay Datablao, Columbio, Sultan Kudarat noong December 17, 2006. Ang dalawang napatay ay mga tauhan ni Kumander Asuona at hanggang sa ngayon ay kasalukuyang inaalam pa ang mga totoong pagkakakilanlan.

Batay sa ulat, nakasagupa ng mga kawal ng 27th Infantry Battalion ang tropa ng mga NPA habang nagsasagawa ng routine Patrol Operation sa magubat na area. Dahil sa katapangan at kasanayan ng tropa ng Army, agad na out maneuver nila ang mga NPA kung kaya't kagyat na nasawi ang dalawang terorista.

Mag-ama, walang awang pinaslang ng mga NPA!!

Tinambangan hanggang sa mapatay ng mga kasapi ng New People's Army ang isang retiradong pulis at walang awa ring idinamay ng mga terorista ang binatang anak nito. Nakaupo sa bakuran ng kanilang bahay sina SPO2 Esmael Bactad, 46 anyos, at ang anak niyang si Richard, sa Barangay Maloma, San Felipe, Zambales noong linggo ng gabi(December 17, 2006). Hindi nila alam, iyon na ang huling pagkakataong magiging magkasama silang mag-ama dito sa lupa.

Nagpapahinga si Esmael at Richard sa labas ng kanilang tahanan nang biglang may humintong motorsiklo sa kanilang bakuran. Bigla, malalakas na putok ng baril ang pumunit sa kapayapaan ng gabing iyon. Bumulagta agad ang katawan ng mag-ama na nabistay ng punglo.

Dalawang buhay na naman ang nalagas dahil sa karahasang inihahasik ng CPP-NPA upang maisulong lamang ang kanilang layunin na makamit ang kanilang baluktot na mithiing agawin ang poder ng pamamahala sa ating bayan.

Hanggang kailan kaya mamumulat ang CPP-NPA? Na sa bawat Pilipinong pinapaslang nila, dugo ng kanilang kalahi ang idinidilig nila sa ating lupain...

Mga Pulis na may dalang relief goods, pinatay ng mga NPA!!

Apat na Alagad ng Batas at isang sibilyan na nagdadala ng relief goods para sa mga nasalanta ng bagyo ang tinambangan ng mga New People's Army sa Barangay Manlutod, Placer, Masbate kamakalawa ng hapon( December 17, 2006) . Ang mga napaslang na pulis ay mga kasapi ng 507th Police Provincial Mobile Group at binistay ng bala ng mga terorista. Nakilala ang mga nasawing pulis na sina PO3 Jose Blair Banaag, PO1's Juan Compuesto, Dominador Raymundo at Andrew Chu. Hindi pa nakukuha ang aydentidad ng sibilyang napaslang.

Ayon sa ulat, sakay ng bangkang de-motor ang mga biktima upang dalhin ang mga relief goods sa mga sinalanta ng bagyo sa nabanggit na area nang paulanan ng punglo ng mga NPA. Nagtangkang lumaban ang mga pulis subalit naoverpowered sila ng mga terorista. Nakatalon naman sa tubig ang sugatang sibilyan na sina Nilo Delapiso at Isagani Garing.

Matapos ang isinagawang pananambang, tinangay ng mga NPA ang mga armas ng mga pulis at maging ang mga relief goods na ipamamahagi sana sa mga naging biktima ng Bagyong Seniang.

Ilang oras matapos ang ambush, inako ng pamunuan ng Jose Rapsing Command ng NPA na pinamumunuan ni Val Silang ang naganap na pamamaslang sa mga biktima.

Kaugnay nito, nagpahayag ng galit sa mga NPA ang mga mamamayan ng Masbate. Ang ginawang pandarambong sa mga relief goods na nakaukol sa mga nasalanta ng bagyo ay isang malinaw at konkretong manipestasyon ng kabuktutang ginagawa ng mga NPA sa kanayunan. "Akala ba namin, naglilingkod sila sa taumbayan? Bakit maging ang mga kawawang pulis na tumutulong sa amin ay pinatay nila, ninakaw din nila ang mga relief goods na para sa amin!!, ito ang mariing pahayag ng isang naghihinagpis na Taong Baryo.

"Pinapatay na nga ng mga NPA kaming mahihirap sa kanilang revolutionary tax, sinisira pa nila ang mga proyekto na maglilingkod sa aming kapakanan? ", ito naman ang nagdadalamhating sinabi ng isang Ka Ambo ng Barangay Manlutod.

19 December 2006

1:35 Pm, Quezon City

Karahasan ng CPP-NPA, wakasan na!!

Madugo ang naging wakas ng buhay rebolusyonaryo ni Arturo Tabara, Setyembre 26, 2004, Linggo ng gabi nang siya ay walang awang pinagbabaril ng mga kasapi ng liquidation squad ng CPP-NPA. Si Stephen Ong, 19 anyos ay nadamay din sa pamamaslang dahil kasama niya si Tabara ng gabing iyon. Si Ong ay kasintahan ng anak ni Tabara na si Rosa Aurora na nagsilang ng isang sanggol isang linggo pa lamang ang nakakaraan. Sa pagkamatay ng dalawa, ilang anak na naman ang nawalan ng ama? Dahil sa karahasan ng NPA, dalawang kababaihan ang nawalan ng kabiyak ng puso.

Si Tabara ay pinuno ng Revolutionary Proletarian Army-Alex Boncayao Brigade(RPA-ABB) na bumaklas sa NPA noong 1992 dahil sa pagsalungat at pagbatikos sa pang-ideyolohiyang linya ng CPP na kontrolado ni Joma Sison. Dahil sa nakita nilang kamalian at lisyang linya na ipinatutupad ng CPP ay kumalas ang grupo nina Tabara. Mula noon, naging target na sila para likidahin ng NPA. Noong 1999, nakipagkasundo sa pamahalaan ang kanilang grupo matapos ang matagumpay na peace talk. Naging layunin ng kanilang grupo na maisulong ang mga konkretong kondisyon tungo sa kapayapaan at maipatupad ang tunay na katarungang panlipunan.

Nakalulungkot isipin na nagiging mailap ang kapayapaan dahil sa di-makatarungang paglikida ng NPA sa kanilang mga dating kasama na yumakap na sa tamang linya tungo sa pagbabago. Dahil sa pagkamulat, iwinaksi ng grupo nina Tabara ang karahasan at armadong pakikibaka upang matamo ang kanilang mga batayang layuning politikal at panlipunan.

Ito ang ayaw ng re-affirmist group ni Sison na namumuno sa CPP-NPA dito sa Pilipinas via remote control mula sa kanyang komportableng tirahan sa Netherlands. Ang RPA-ABB ay itinatag nina Tabara, Nilo Dela Cruz at Popoy Lagman. Si Lagman ay nilikida sa UP Campus noong Pebrero 2001 samantalang ang dating NPA Chief na si Romulo Kintanar ay tinadtad din ng bala ng dalawang gunmen sa isang restaurant sa lunsod ng Quezon noong Enero 2003. Isa pang lider ng RPA-ABB, si Daniel Batoy ang pinatay ng NPA noong August 22, 2004. Nadamay din sa pamamaslang ang anak ni Batoy na babae na nagkataong kasama niya ng oras na siya ay binaril.

Hanggang saan hahantong ang walang saysay na pagpaslang ng NPA sa mga dati nilang kasama? Kung tutoong pagpataw lamang ng disiplina ang kanilang pakay sa utos na rin ni Sison, bakit hindi man lamang naparusahan si Jose "PEPE" Luneta? Si Luneta ay responsable sa madugong purging operation sa mga kasapi ng CPP-NPA sa Timog Katagalugan noong Dekada '80. Sa operasyong iyon, libu-libong kadre at tapat na mga kasapi nila ang ibinaon sa mga Killing Fields. Sa ngalan ng rebolusyon at Partido? Hindi! Para sa pansariling interes ng kanilang pinapanginoong si Joma Sison. Ayon sa isang naging kasama nila noon, " Si Luneta ay hindi pinarusahan dahil siya ngayon ay isang tapat na utusan ni Joma sa Netherlands. Siya ang taga-timpla ng kape ni Joma."

Sa kasaysayan, ang estratehiya ng mga komunista sa pagsunggab ng pampulitikang kapangyarihan ay nakahanay sa KARAHASAN at PANLILINLANG. Walang halaga sa kanila ang buhay ng isang tao. Para sa kanila, ang tao ay binubuo lamag ng mga molecules, Man is only a matter. Walang ikalawang buhay sa langit o paraiso. Sila ay humihingang makinarya lamang ng kanilang partido. Noong 1934, ipinagyabang ni KLEMENTI VOROSHILOV, naging pangulo ng bansang RUSSIA na noong 1919 ay nahimok niya ang (11,000) labing-isang libong Czarist Officers sa KIEV na sumuko dahil sa kaniyang pangako. Ipinangako niyang makakabalik ang mga opisyal na iyon pati ang kanilang mga asawa at kamag-anak sa kani-kanilang mga tahanan. Nang sumuko ang mga opisyal kay VOROSHILOV, agad niyang ipinapatay ang 11,000 na Czarist Officers at ang lahat ng mga lalaking anak ng mga ito. Ang mga asawa at anak na mga babae ay ipinadala naman sa mga bahay putahan upang gamitin at pagparausan ng mga tauhan ng Russian Army. Dahil sa hirap na dinanas, hindi tumagal ng tatlong buwan ang buhay ng mga kababaihan.

Ang ganitong karahasan ay pangkaraniwan sa mga bansang nasakop ng mga komunista. Sa Cambodia, halos Tatlong Milyon( Kalahati ng Populasyon) ang ipinapatay ni POL POT ng Khmer Rouge. Dito sa Pilipinas, hindi pa sila nakakapuwesto, karahasan at panlilinlang na rin ang kanilang isinusulong upang makuha ang suporta ng mga uring magsasaka at manggagawa. Pakikipag-alyansa sa mga batayang sektor ang estratehiyang kanilang isinasagawa. Lahat ng klase ng isyu ay kanilang ginagamit at sinasakyan upang makuha ang simpatiya ng sambayanan. Bilang mga makabayang Pilipino, dapat nating hadlangan ito! Salungahin natin at maigting na tutulan ang pagmamanipula ng CPP-NPA sa kaisipan ng ating mga kababayan na ang tanging mithiin ay wasakin ang Demokrasya at itayo ang pamahalaang Diktadurya ng mga proletaryo.

Kapag hindi tayo kumilos ngayon, ilang mga anak pa kaya ang mangungulila sa yakap at kalinga ng kanilang napaslang na mga ama? Ilang mga biyuda pa kaya ang luluha at mananahan sa dilim ng pamimighati?...

Kalakhang Maynila

8:30 AM, 15 December 2006

SISON at GREGORIO ROSAL, kinasuhan ng murder sa MASBATE

Kinasuhan ng pulisya ng kasong murder si CPP founder Jose Maria Sison at iba pang lider ng New Peoples Army kaugnay ng kasong pamamaslang sa isang barangay captain sa Palanas, Masbate noong nakalipas na November 1, 2006.

Maliban kay SISON, sinampahan din ng kaso sina Gregorio Rosal, Danilo Masanto, Constantino Tamayo at iba pang lider ng Local Communist Terrorist Movement (LCTM) sa Masbate Provincial Prosecutors Office. Ang kaso ay naka-docket bilang 06-19990.

Nag-ugat ang kasong isinampa ng PNP dahil sa isinagawang pagpatay ng mga NPA kay Barangay Captain Rodrigo Abejuela ng barangay Malibas sa bayan ng Palanas. Walong mamamatay tao na kasapi ng NPA ang sangkot sa nabanggit na pamamaslang.

Ayon sa Task Force USIG na tumututok sa pagresolba sa mga nabanggit na pamamaslang sa mga militante at journalists, pinupurga ngayon ng NPA ang kanilang sariling hanay na kahalintulad ng kanilang ginawa noong 1980's. Sa isinagawa nilang purging operations, libong kasapi ng NPA ang pinatay mismo ng kanilang mga kasama. Ang walang awa nilang pagpaslang sa kanilang mga kasama na pinagbintangang bumaligtad na sa kanilang marahas na layunin ay sinasamantala pa nila upang gamiting propaganda laban sa pamahalaan. Sa ganitong taktikang pampropaganda, agad nilang ibinibintang sa gobyerno ang mga pamamaslang na kanilang ginawa.